1Ti 5 | MHL | STEP | Aria wi mua iperowa opor kekanowa me wia maake. Nena niawi opora maakin naap kekelka wia maake. Takira me wia kakanke, nena niamun wia saliwin naap wia saliwe.

1 Timothy 5

Wi emeria mua wia kakenowa sira

1 Aria wi mua iperowa opor kekanowa me wia maake. Nena niawi opora maakin naap kekelka wia maake. Takira me wia kakanke, nena niamun wia saliwin naap wia saliwe. 2 Emer iperowa opor eliwa wia maake, nena neene wia maakin naap. Wiip takira opor sira oko-ko me wia maake, kakeniw wia maake, nena nekera wia maakin naap.

Wi emeria apura opora-ke

3 Aria wi emer apura, muuka wiipa wiimasip marewa nain, no baliwep akena wia kakalte. 4 Ne apura eena muuka wiipa e wiimasip onaiya ikemik nain wi Mua Maneka kema suuwap sira feenap onuk. Mokomokoka wiena wiawi, onak, wokome ne weke wia kakaltuk. Moram iiriw wis-ke wia kakaltiwkin arimemik, naapeya wi nain kiripami wis pun naap wia kakaltuk. Mua Maneka sira nain manek akena kookaliya.

5 Ne wi emer apura wia kakaltow mua marew akena nain wi feenap onuk, Mua Maneka sira ookami anane amirika ne uura o faremi yia asipinok naep nokarem-ikauk. 6 Ne emer apura-ko ona mia kookalowa ookiya nain umep ikowa saarik ikua, kema marewa momora saarik ikua.

7 Ne fain pun wia maakeya opora baliwep ookami opora marew ikauk. 8 Mua ona samapora epaskun ne ona teeria kakeniw me wia kakaltinon-na mua nain Mua Maneka opor makena wiar fieninon. Wi sisin mua-ke wiena teeria wia kakaltimik, ne o wia, sira samor akena oniya, naapeya wi sira eliwa nain wiar nomakemik.

9 Ne sios teeria wi emer apura wia kakaltowa nain wi apura sira fain unuma wia aawe. Emer iperowa akena, mokoma unow akena aawok nain. Ne o mua kuisow muuta aawep ikaeya mua wiar umok. O eena uuwow ele-eliwa oneya emeria eliwa-ke naimik nain. Ona muuka wiipa teeria baliwep wia kakaltam-ikua, owow oko mua wia tetariya, ona wame poromi wi Kristen teeria wia saliwiya, ne wi mua baliwep me ikemik nain wia naapiya, sira eliwa unowa oniya nain. Wi apura naap nain unuma wia aaweya sios teeria-ke wia kakaltam-ikauk.

11 Aria wi emeria takir eliwa ikok apuraremik nain unuma me wia aawe. Oko wi Krais teeria-pa ikok nainiw muewowa kema urupep mua wiokami Krais mikikira iwikuan. 12 Krais wameiya opora koonowamik nain puukap pina aawikuan. Naapeya maa anima mia-pa wiam wuikuan. 13 Ne oko pun, wi oram ikok lebumarep ikip paapar-yiawikuan. Ne maa me wiar aakunowa nain murarow opora onami neeke mufem-miawikuan. 14 Wi apura papako iiriw i teeria yiamiya ikok yia piipuap Satan teeria oromik. Naapeya yo feenap maiyem, wi emeria takir eliwa ikok apurarimik nain wi naap oram ikok nainiw muewuk. Naeya wiena muuka wiipa teeria wia kakaltam-ikauk. Naap onikuan-na, i Kristen yia tuunow opora me yiar imenarinon.

16 Aria wi emeria Yeesus ookimik nain feenap onuk, ona teeria emer apura-ko ikainok-na ona eliw o kakaltam-ikainok. Naap oninon-na i sios teeria-ke wi apura nain kakaltowa yoowa me aawikuan. Wi apura wiisow akena ikemik nain muutiw eliw wia urufam-ikauk.

Wi woos mua opora-ke

17 Aria wi woos mua uuwowa baliwep uuwimik nain sesa baliwep wieka. Makena, wi woos mua Mua Maneka opora wia maakemi opor kemena baliwep wia ookomimik nain naap wia oneka. Ekima wia opap sesa maneka wieka. 18 Moram Mua Maneka opora feenap maek,

“Bulmakau uuwami wit makena ititam-ikaeya opaimika me wiar sapum ere, uuwami wit makena neek eniminok.”
(Lo 25.4)

Ne opor oko pun feenap maek,

“Uuwow mua sesa kakeniw opam-ikauk.”
(Lo 24.14-15)

19 Aria, mua kuisow-ke maeya-na “Woos mua nain sira samorak.” Naap mainok-na mua kuisow maiya nain me wiar miime. Mua arow-i e erup-ke maiwkin-na, opora wiar miime. Neemi mua unowa mokok epa-pa pina nain wiar kakenami ariman wia amukare. Naap wia oneya wi papako wia urufap keker opap wis pun sira samora me onuk.

21 Aria Mua Maneka, Yeesus Krais ne wi ensel parina onaiya ikemik nain mokok epa-pa opor kekanowa nefa maakiyem, no uuwowa nain baliwep one. Opora-ko imenareya-na onoma baliwep ook-afurap ariman mae. Mua kamenap nain emina me wia urure. 22 Mua-ko ewur akena Yeesus teeria woos mua me wia pepekime. Oko mua nain iiriw pina onap ikaeya o pepekimemi nos pun pina wiar aawinan. Aria no nena pun name urufami, pina ao-wuepami baliwep akena ike.

23 Ne maa oko maiyem, feenap, no eka dabela muutiw me enime. Iir kui-kuisow wain gelemuta onaiya kiripap enimeya uroma nefa naapinok, ne urom napuma anane nefar imenariya nain nefar iirarinok.

24 Aria wi papako pina ariman wiar ikua nain opora-pa wia wuimik. Ne papako pina kokot wiar ikua nain pun ikoka iiwawun wiar ariman aromakinon. 25 Sira eliwa pun naap, sira eliwa onikuan-na ikoka ariman wiar arinon. Ne sira eliwa kokot onimik nain pun ikoka wiar amisarikuan.